Menene cin zarafi ko wulakanta takardar Naira?

Labarin daure shahararriyar ‘yar Tiktok din nan Murja Ibrahim Kunya da kotu tayi na wata shida da kuma wani ango a kwanakin baya mai suna Abdullahi Musa, wanda dukkan su  saboda sun wulakanta ko ace sunci zarafin takaradar Naira ta hanyar watsi da kuma liki, zai sanya mutane da dama canza yadda suke lika kudi lokacin bukukuwa.

A watan Janairu ne dai hukumar EFCC ta kama Murja Kunya bisa zargin cin zarafin takardar Naira ta hanyar watsi lokacin da take zaune a otel din Tahir dake Kano.

A ranar 28 ga watan Mayu 2025 wata kotu a Kano ta yanke hukunci tasa keyar Murja zuwa gidan gyara hali har na tsawon watanni shida.

((https://www.efcc.gov.ng/efcc/news-and-information/news-release/11058-kano-tiktoker-murja-kunya-sentenced-to-six-months-jail-term-for-naira-abuse))

 A watan Afrilun da ya gabata ne dai kotu a Kano ta yanke hukuncin daure Abdullahi Musa na watanni shida bisa tuhumarsa da hukumar EFCC tayi na cin zarafin takardar Naira, a ranar bikin sa.

((https://www.efcc.gov.ng/efcc/news-and-information/news-release/10865-kano-court-jails-make-up-artist-for-naira-abuse#:~:text=Justice%20S.M%20Shuaibu%20of%20the,and%20mutilation%20of%20the%20Naira.))

Akwai dokar dake kula da yadda ya kamata ayi da takardar Naira lokacin bukukuwa. Dokar babban bankin Najeriya ta shekarar 2007 ta bayyana, liki, rawa a kan takardar Naira na iya sanya a daure mutum na watanni shida ko tarar Naira dubu hamsin (N50,000) ko kuma ma duka biyun.

((https://www.cbn.gov.ng/currency/banknoteHandling.html))

Dokar sashe na ashirin da daya, biyar cikin baka [ 21(5)(ii)] ya bayyana haramcin; “lika ko watsa takardar Naira ta hanyar ado, ko likawa a kowanne sashe na jikin mutum ko watsa kwandaloli koda kwabo ne a biki.”

  Baya ga batun liki akwai sauran abubuwan da suka zama laifi wanda na iya sanya mutum samun matsala da hukumar EFCC ko CBN.

Wadannan abubuwa da suka kasance cin zarafi ko wulakanta Naira sun hada da; rubutu a kan takardar Naira, yaga wa ko yage wani bangare na takardar Naira, kudundune takardar Naira, like takardar Naira a allo ko bango, yin ado da takardar Naira, misali sanya takardar a cake din bikin tunawa da ranar haihuwa, ko jera takardar Naira kamar fulawa wato fure, siyar da sabbin takardun Naira a guraren biki, taka takardar Naira lokaci rawa.

Duk wadannan sun kasance laifukan da ka iya sanya mutum ya sami hukuncin daurin wata shida ko tarar Naira dubu hamsin ko ma duka biyun.

Don haka Idan kuma tunanin yin liki da takardar Naira ko daya daga cikin laifukan da muka bayyana ku tuna cewa zaku iya zaman gidan gyara hali na watanni shida?