Yadda wasu scholarship kan sanya ‘yan Afrika cikin bauta

A ‘yan shekarun bayan na ne dai rahotanni suka nuna cewa akwai tallan guraben bada tallafin karatu wato scholarship na bogi daga ƙasar Rasha. Waɗannan scholarship dai idan mutum ya isa kasar ta Rasha sai ya tarar babu wannan gurbi, daga bisani kuma a yaudari ko kwaɗaitar da mutum sanya hannu a aikin masana’antar samar da jirage marasa matuƙa ko kuma shiga aikin soja sannan a turashi filin yaƙi.

Kwanakin baya ma dai sai da gwamnatin Najeriya ta hannun ma’aikatar harkokin waje ta nesanta kanta daga cewa tana sane da batun wannan scholarship na bogi da ake kai ‘yan Najeriya suyi bauta.

((https://africa.businessinsider.com/local/lifestyle/nigeria-distances-itself-from-russian-scholarship-linked-to-military-drone-production/errp74k))

A kwanakin baya da Alkalanci ta ziyarci ƙasar Ukraine ta gana da wasu ‘yan Afrika da sojojin Ukraine suka kama wadanda suna cikin sojojin da Rasha ke amfani dasu. A cikin sojojin akwai wani dan ƙasar Ghana mai suna Joshua inda ya bayyana cewa ya sami kansa a wannan ruɗani ne bayan samun scholarship a ƙasar Rasha, amma da ya je ƙasar abu sai ya canza.

Wani ɗan Najeriya mai suna Kylian ya tallata masa aikin gadi a wani yanki da Rasha ta mamaye daga Ukraine, inda yace masa hakan zai sa ya sami Fasfo din Rasha cikin sauki kuma akwai albashin da ya kai $2,480.

Bayan sanya hannu a takardar aiki, maimakon gadi sai aka tura Joshua sansanin soji a Avangard inda aka horas dashi na sati biyu, daga nan aka tura shi fagen yaƙi.

Haka zalika sauran furzunonin yaƙi daga Afrika sun nuna yadda ko dai aka yaudare su ko kuma kwaɗaitar dasu albashi da samun Fasfo ɗin Rasha wajen tura su fagen yaki.

((https://adf-magazine.com/2025/08/african-nations-warn-students-of-russian-education-scams/))

Kwanakin baya ma dai an kawo rahoton wani ɗan Najeriya da sojin Ukraine suka kama yana yaƙi a cikin sojin Rasha.

Ana son yaudarar ƴan Arewa?

Wani shafin Facebook mai suna Ismail Sulaiman ya wallafa labarin daukar karatu kyauta wato scholarship da kasar Rasha zata yi wanda ya hada har da ‘yan Najeriya.

A rubutun ya ce “ An buɗe scholarship na ƙasar Rasha 🇷🇺. Ko ba ka da international passport zaka iya cike wa daga matakin Digirin Farko har zuwa PhD da Postdoctoral programs.”

((https://www.facebook.com/share/p/16oLMMspY4/?mibextid=wwXIfr))

Abun lura dangane da wannan scholarship da ake tallatawa yanzu haka shine ta yaya mutum zai iya tafiya wata ƙasa ba tare sa Fasfo ba kuma karatu daga matakin digiri na farko har zuwa na uku.

Sannan baya ga cewa karatu kyauta kuma akwai ɗan na kashewa da za’a dinga bawa mutum, tallan wannan scholarship ya ƙara da kwaɗaitar da mutane cewa zasu iya aikin da zasu sami kuɗi sama da kuɗin da ya kai Naira N1,000,000.

Sannan an rubuta cewa mutum na da damar zama ɗan Rasha Idan ya cike wasu sharuɗɗa.

Waɗannan batutuwa dai sunyi kama da irin yaudarar da akawa da dama daga ‘yan Afrika wajen shiga yaƙi ko kuma bautar dasu wajen ƙera jirage marasa matuƙa.

Me hukumomi ke cewa?

Jakadan ƙasar Ukraine a Najeriya Ivan Kholostenko ya shawarci ‘yan Afrika da su kula matuyka dangane da scholarship daga ƙasar Rasha musamman kasancewar sojin Ukraine sun sha kama ‘yan Afrika da Rasha ke amfani dasu a matsayin sojoji.

“Bayanan da muke da su sune Rasha na amfani da ‘yan kasashen waje wajen yaƙi da ƙasar mu, tana saka su cikin haɗari domin cimma burinta. Ya zuwa yanzu akwai ‘yan Afrika da dama dake gidajen yarin Fursunonin yaƙi bayan da Rasha ta tura su fagen yaƙi.”

Shima Jakadan ƙasar Rasha a Najeriya ya musanta zarge-zargen amfani da scholarship na bogi.

Ma’aikatar harkokin wajen Najeriya dai ta jaddada bukatar ‘yan Najeriya su yi taka tsan-tsan wajen cike ko karɓar guraben karatu kyauta wato scholarship saboda akwai na bogi ko yaudara dake bautar da mutane ko safarar su.